វាចារពិត

សូម​ស្វាគមន៍​មិត្ត​អ្នកអាន​ដែល​មក​រក​ភព​គ្មាន​ជីវិត​ឃើញ (​ខ្ញុំ​មិន​ហ៊ាន​និយាយថា សូម​ស្វាគមន៍​ដែល​មក​រក​ឋាននរក​ឃើញ​ទេ ព្រោះ​ថា​វា​អាក្រក់​ស្ដាប់​បន្តិច​)​។ នៅ​ទីនេះ​មាន​រឿង​កំប្លែង​ខ្លីៗ​ច្រើន​គួរសម ហើយក៏​មាន​រឿង​សោកសៅ​ដែល​ពាក់ព័ន្ធ​នឹង​ជីវិត​ខ្ញុំ​ផ្ទាល់​ផងដែរ​។ ខ្ញុំ​ចូល​ចិត្ត​សរសេរ​រឿង​កំសត់​ទុរគត៌​ផ្ទាល់ខ្លួន​ឱ្យ​អ្នក​ដទៃ​ដែល​ចូល​មក​អាន​ដោយ​ចៃដន្យ ជាជាង​ទៅ​និយាយប្រាប់​មនុស្ស​ដែល​ខ្ញុំ​ស្គាល់​ជាហេតុ​ធ្វើឱ្យ​គេ​ថ្លង់​ត្រចៀក​។ ពេលខ្លះ​ទុក​ណា​ជា​មិត្ត​ខ្ញុំគេ​អង្គុយ​ស្ដាប់​ខ្ញុំ​គឺ​គ្រាន់តែ​ជា​សុជីវធម៌​មួយ​ប៉ុណ្ណោះ ព្រោះថា ‹​មនុស្ស​ម្នាក់ៗ​រស់​នៅក្នុង​សង្គម​ត្រូវ​ចេះ​ធ្វើ​ពុត​ជា​ការចាំបាច់​ដែល​គេ​ហៅ​ថា​សុជីវធម៌​› តាម​ខ្ញុំ​ដឹង​មនុស្ស​គេ​មិន​ចូលចិត្ត​ស្ដាប់​រឿង​ទុក្ខសោក​ទេ គេ​ចូលចិត្ត​សប្បាយ​ជាជាង​។ លើ​លោក​នេះ​វា​គ្មាន​នរណា​ដែល​មិន​កំសត់​នោះទេ គ្រាន់តែ​ថា​មាន​តិច​ឬ​ច្រើន​ប៉ុណ្ណោះ​។ អ្នកខ្លះ​ក៏​និយាយ​ចេញមកក្រៅ អ្នកខ្លះ​ទៀត​ក៏​លាក់ទុក​ក្នុង​ចិត្ត តែ​ខ្ញុំ​សុំ​ស្រែក​ជំ​ទាល​នៅ​ទី​នេះ​ហើយ ព្រោះថា​បើ​ទុក​ទៅ​ខ្លាច​ថា​ងាប់​ទៅ​ដោយ​ចៃដន្យ​ឬ​ដល់​អាយុកាល ហើយ​គ្មាន​នរណា​បានដឹង​។ បើ​មិត្ត​អ្នកអាន​ចង់ដឹងថា តើ​ខ្ញុំ​ហ្នឹង​មាន​រឿង​អ្វី​ខ្លះ​ទៅ​នៅ​ក្នុង​ជីវិត​? សូម​ចុច​លើ Category ‹​រឿងរ៉ាវ​ជីវិត​›​ ផ្ទុយទៅវិញ​បើ​មិត្ត​អ្នកអាន​ចង់​រីករាយ សូម​ចុច​លើ Category ‹​កំប្លែង​›​។ សូម​អស់​យោបល់​ត្រឹមនេះ​ហោង …… អេ​វំ !